Via Campesinak "armen salmenta, laguntza militarra eta Israelen okupazioarekiko merkataritza akordioak berehala bertan behera uztea" eskatzen du, baita "gerra krimenengatik zigorrak eta auzipetzea" ere agintari israeldarrei, Palestinan "genozidioa" egiteagatik. Bestalde, Gernika-Palestina herri ekimenak "genozidioaren" aurkako manifestazioa deitu du biharko, larunbata, Donostian.

Palestinako egoera larriagotu egin da. Martxoaren 18an, Israelek su-etena hautsi zuen Gazako zerrendan, gune humanitarioak eta bizitegi-auzoak bonbardatuz eta, gutxienez, 400 pertsona hilez. 17 eguneko blokeoaren ondoren egin zuen, non hornidura komertzial eta humanitarioen sarrera eten zuen, erregaia barne. Gainera, martxoaren 9an, Israelek argindarra eteteko agindua eman zuen, eta horrek eragina du Gaza hegoaldeko ura gatzgabetzeko plantaren funtzionamenduan.

Ekialde Hurbileko errefuxiatuentzako Nazio Batuen Agentziak (UNRWA) jakinarazi duenez, 2023ko urriaren 7tik 2025eko martxoaren 11ra bitartean gutxienez 48.503 palestinar hil eta 111.927 zauritu zituzten Gazan. Zifra horiek gora egin dute, gutxienez 400 pertsonatan, azken erasoen ondoren.

Urtebete baino gutxiagoko 786 haur hil ditu Israelek

Gazako Osasun Ministerioaren txostenen arabera, 13.319 haurrak dira, 7.216 emakumeak, 3.447 adinekoak eta 16.735 gizonezkoak. Haurren artean, 786 urtebetetik beherakoak ziren. Gainera, 2024ko urriaren 7ra arte, Osasun Ministerioak adierazi zuen 35.055 haurrek guraso bat edo biak galdu zituztela aurreko urtean.

Gainera, familien %92k kalte larriak jasan dituzte edo suntsitu egin dituzte. Eraso-bolada berri honetan, Israelgo indarrek Gazako hainbat eremu nahitaez husteko agindua eman dute, eta herritarrak berriz ere nahitaez mugitzera behartu dituzte.

Izan ere, Nazio Batuen Giza Eskubideetarako Goi Komisario Volker Türkek berak Israeli dei egin dio Zisjordanian hamarkadak daramatzan asentamendu-politika amaitzeko, erakunde okupatzailearen politika horri dagokionez "gerra-krimena" dela iritzita.

GENOZIDIOAREN AURKAKO MANIFESTAZIOA BIHAR DONOSTIAN

Gernika-Palestina herri ekimenak deitutako manifestazio batek Donostiako kaleak zeharkatuko ditu bihar, larunbata, Palestinaren aurkako genozidioa salatzeko. Ekimenak "ezinbestekotzat" jotzen du euskal gizartearen erantzuna.

Bi hilabeteko su-etenaren ondoren Israelek hautsi eta berriz eraso egin die palestinarrei, Gaza bonbardatuta, 400 hildako baino gehiago eraginez. Horren aurrean, Gernika-Palestina ekimenak mobilizazio nazionala deitu du larunbaterako, hilak 22, Donostian.

Ohar batean adierazi duenez, «itxaropenez» bizi izan dituzte su-etena iraun duen azken bi hilabeteak. Hala ere, Israelek «Trumpen babesarekin eta nazioarteko komunitatearen isiltasunarekin» su-etenari jarraipenik eman ez diola deitoratu du. «Beste behin ere, genozidioaren aldeko hautua egin du palestinar herria krudelkeriaz bonbardatuz eta umeak jopuntuan jarriz», gaineratu du herri ekimenak.

Horren aurrean, «euskal gizartearen erantzuna ezinbestekotzat» jotzen du eta larunbatean ‘Genozidioa stop! Israel, ¡alto el fuego ya!’ lelopean kalera ateratzeko deia egin du. Duela urtebete juxtu Gazaren aurkako genozidioaren kontrako mobilizazio deigarri eta erraldoia egin zuen Donostian, genozidioaren biktimak irudikatuz.

Bulebarretik Saguesera

Larunbateko mobilizazioa Boulebarretik abiatuko da, 17.30ean, eta Sagueseraino joango da. Funtsean, nazioarteko komunitateari eskatzen dio «dituen baliabide guztiekin Israel behartu dezala nazioarteko erabakiak behingoz betetzeko eta su-etenaren bideari itzultzeko Palestinako herriaren eskubideak bermatze aldera, hau da, Palestinak justizia, lurra eta bakea izan ditzan».

Eragile sozial, politiko eta sindikalei mobilizazioarekin bat egiteko dei egin die Gernika-Palestinak. Etxaldemugimenduak dagoeneko iragarri du ekimena babesten duela. Horren berri emateko eta manifestazioaren nondik norakoak ezagutarazteko prentsaurrekoa egingo dute ostegunean, martxoaren 20an, Saguesen bertan.