Elkarretaratze jendetsuak Bizkaiganeri babesa adierazi dio gaur goizean Gernikako Epaitegien aurrean, EHNE Bizkaiak egindako deialdiari erantzunez. Errigoitin (Bizkaia) kokatutako proiektu horrekin jarraitzea edo proiektua utzaraztea ebazten da gaur instantzia judizial honetan.

Bizkaigane, azken berrogei urteetan eraiki da, eta ustiategian bertan ekoitzitako elikagaiak eraldatzera bideratuta dago, abeltzaintza jarduera dibertsifikatu baten bidez (esnetarako eta haragitarako behiak, ardiak, txerriak). Gaur egun, Txapel Koop-ek kudeatzen du, eta hamaika pertsonak egiten dute lan zuzenean. Ekoizpen guztia ekologikoa da, eta egiten ari den belaunaldi erreleboko prozesua eredugarria eta inspiratzailea da jende gaztearen premia handia duen nekazaritza sektorearentzat.

Bizkaiganeko jatorrizko instalazioak utzarazteko eskaerari egin behar diote aurre. Bertan, gaur egun, txerri ekoizpena eta orain dela gutxi martxan jarrita, haragia eraldatzeko instalazioak dituzte, lege eta administrazio eskakizun guztiak betez.

"Bizkaigane aurrera" leloa behin baino gehiagotan oihukatu zen elkarretaratzean, Amets Ladislao EHNE Bizkaiko ordezkariak sindikatuaren "babes osoa" adierazi zion Bizkaiganeri.

Belaunaldi-erreleboa

Ladislaok adierazi zuen Bizkaiganen gertatzen den belaunaldi-erreleboa "erabat blindatua" egon beharko lukeela, "gure sektorean gazteen presentzia ezinbestekoa baita" eta sektorearen jarraipena bermatzen baitu "datozen 40 urteetarako". Horregatik, Bizkaigane "estrategikoa" eta "erreferentea" da.

Ondoren, Markel Enzunza Bizkaiganeko langileak adierazi zuen ustiategi horretan lan egiten duten pertsonak "ez direla okupak" eta, bertaratutako guztien laguntzarekin, "beste berrogei urtez" jarraituko dutela proiektua garatzen.

EHNE Bizkaiak aurretik adierazi zuen "Bizkaiko nekazaritza sektoreak ezin duela arriskuan jarri horrelako proiektu bat, elikagai ekoizpen iraunkor eta hurbileko zirkuituen bidez merkaturatutako baten adierazle sendoa eta argia dena".

"Proiektu honek -argudiatu zuen sindikatuak- tokiko elikadura sistemak garatzeko osagai guztiak biltzen ditu, bai eta nekazaritza jarduerari jarraipena ematea ahalbidetzen duen belaunaldi erreleboa aktibatzea ere". "Elikadura burujabetza Bizkaigane bezalako proiektuen garapenaren eta defentsaren mende dago".

Hori dela eta, EHNE Bizkaia-k Txapel Koop kooperatibaren aurka egindako utzarazte eskaera geldiarazteko eskatzen du.