EHNE Bizkaiak positibotzat jo du gaur Jaurlaritzak eta Arabako, Bizkaiko eta Gipuzkoako aldundiek aurkeztutako ‘Belaunaldi Erreleborako Estrategia Integrala’. Nekazarien sindikatuaren iritziz, "belaunaldien arteko erreleborako eta nekazaritzan pertsona berriak jartzeko esparru berri bat da".

EHNE Bizkaiaren ustez, estrategia instituzional berri honek "aldaketa garrantzitsua dakar alderdi kualitatiboan zein kuantitatiboan". 10 urtera begirako estrategia da, eta "hori, berez, oso aldaketa garrantzitsua da Nekazaritza Sailean".

Era berean, bere ustez, "egoeraren azterketa eta plan estrategiko honen helburuak bat datoz"; izan ere, "ez gara esparru teorikoaz soilik ari, estrategia garatzeko mekanismo eta finantza-baliabide esanguratsuak artikulatzen dira".

Baserritarren sindikatuaren iritziz, plan hau "belaunaldien arteko erreleborako eta nekazaritzan pertsona berriak jartzeko esparru berri bat da". Hala ere, ñabardura bat egin du: "Orain koadroa osatzen asmatu behar dugu".

Izan ere, EHNE Bizkaiak azpimarratu du estrategia hori gauzatzeko orduan bitartekaritza-bulegoek  –lurralde bakoitzean garatuko den mekanismo berria– "funtsezko zeregina" izango dutela  "laguntza eraginkorra eskaintzeko orduan".

Estrategia

Jaurlaritzak eta Foru Aldundiek nekazaritza sektorerako atzo aurkeztutako Belaunaldi Erreleborako Estrategia Integrala 25 milioi euroko aurrekontu bateratuarekin sortu da datozen hiru urteetarako, eta hamar urteko epemuga du, eta 1.250 gazte sektorean sartzea espero da.

Plana dimentsio ekonomiko errentagarria duten eta titularrak erretiratuta edo erretiroa laster hartzekotan dituzten 1.500 nekazaritza-ustiategitan ardazten da. Kalkuluen arabera, 750 inguruk ez dute identifikatutako erreleborik, eta horrek arriskuan jartzen du horien jarraipena epe labur eta ertainean. Ustiategi horiek dira lehentasunezko jarduera guneak.

Estrategia esku hartzeko funtsezko zortzi arloren eta 22 neurri zehatzen inguruan egituratzen da. Amaia Barredo Eusko Jaurlaritzako Elikadura, Landa Garapen, Nekazaritza eta Arrantzako sailburuak zehaztu duenez, bost jarduera aipagarrienen artean daude:

• • bi sentsibilizazio-kanpaina abian jartzea lehen sektoreak euskal ekonomian duen balio estrategikoa ikusarazteko eta nekazaritza-bokazio berriak erakartzeko
  • foru-aldundiek ustiategien bitartekaritza-bulegoak, erreleborik ez duten lagatzaileen eta sektorean sartu nahi duten gazteen arteko topagune izango direnak, sortzea
  • Gaztenek programa berrikustea eta indartzea, nekazari gazte berriak instalatzean eraginkortasuna hobetuz.
  • laguntza-lerro berriak aktibatzea aurreikusten da nekazaritzako test gune iragankorrei laguntzeko eta nekazaritzako ustiategietan belaunaldi-erreleboa sustatzeko. Bi kasuetan laguntza ustiategiak lagatzen dituzten pertsonei emango zaie, hau da, erretiroa hartzetik gertu dauden edo dagoeneko erretiratuta dauden titularrei
  • SENDOTU finantza-tresna finkatuko da, jardueren lehenengo urteetan gazteei maileguak abalatzeko aukera emango duena, eta 9,75 milioi euroko zuzkidura dago aurreikusita.

Hurrengo urratsak

Belaunaldi Erreleborako Estrategia hedatzen hasi da, eta datozen hilabeteetan funtsezko hainbat jarduera abiaraziko dira:

• • Nekazari Gazteen Estatutuaren aldaketa
  • nekazaritzako test gune iragankorretarako eta belaunaldi-erreleboa sustatzeko laguntza-agindu espezifikoa egitea
  • sentsibilizazio-kanpainaren lehenengo fasea abiaraztea maiatzetik ekainera bitartean
  • bitartekaritzako bulegoak antolatzea eta abian jartzea; bai eta erreleborik ez duten ustiategiak identifikatzea eta depuratzea ere
  • instalaziorako laguntzari buruzko NPBPE fitxa aldatzea (Gaztenek programa)
  • curriculum-profilak berrikustea prestakuntza arautuan (erdi mailan eta goi-mailan) Hezkuntza Sailarekin koordinatuta
  • gaztetzearen ikuspegia integratzea LEADER Estrategian

Gainera, aurreikusten da gida bat egitea gazteak sektorera hurbiltzeko, informazio-liburuxka bat argitaratzea, EAEko notaritzetan ere eskuragarri egongo dena, eta nekazaritzarik ezaren gizarte- eta lurralde-kostuari buruzko azterlan bat eskatzea.